Exodus 36

1Kunjalo-nje uBhezaleli lo-Oholiyabhi laye wonke umuntu uJehova amupha ubungcwethi lokwazi ukwenza wonke lumsebenzi wokwakha indlu engcwele, bonke laba bazakwenza umsebenzi njengokulaywa kwabo nguJehova.”

2Ngakho uMosi wasebiza uBhezaleli, u-Oholiyabhi labo bonke abalo-bungcwethi labo uJehova eyebaphe ulwazi njalo bezimisele ukwenza lowo msebenzi. 3Bemukela abakuphiwa nguMosi okwakuyiminikelo yabako-Israyeli benikelela ukwakhiwa kwendlu engcwele. Abantu baqhubeka beletha iminikelo yabo ukusa kwamalanga wonke. 4Ngakho zonke izingcitshi ezazisenza umsebenzi wonke wokwakha indlu engcwele zatshiya yonke imisebenzi yazo 5zathi kuMosi, “Abantu baletha okunengi kulalokho okuswelekayo nxa silandela lokho uJehova alaya ukuba kwenziwe.”

6Ngakho uMosi wakhupha isiqondiso basebethumela ilizwi ezihonqweni elithi, “Kakho owesilisa loba owesifazana osamele enze olunye ulutho ukuthi lube ngumnikelo wendlu engcwele.” Ngalokho abantu bavinjelwa ukuletha okunye futhi, 7ngoba abasebelakho kwasekukunengi okwedlula lokho okwakuzaphetha umsebenzi.

IThabanikeli

8Wonke amadoda alobungcwethi phakathi kwabasebenzayo akha iThabanikeli ngamakhetheni alitshumi enziwe ngelembu eliphothwe kuhle ngentambo eluhlaza, eyibubende kanye lebomvu, lececiswe ngamakherubhi kungumsebenzi wobungcitshi.

9Wonke amakhetheni ayelingana ubude bawo buzingalo ezingamatshumi amabili lesificaminwemibili kuthi ububanzi buzingalo ezine. 10Babambanisa linye ngalinye lamakhetheni amahlanu, benza njalo lakwamanye amahlanu. 11Basebesenza ngelembu eliluhlaza izihitshelo belandela umphetho wekhetheni elisekucineni kulixha lakuqala, kwenziwa okufananayo kulixha lesibili. 12Benza njalo ezinye izihitshelo ezingamatshumi amahlanu kukhetheni lokuqala, benza futhi ezinye izihitshelo ezingamatshumi amahlanu kukhetheni lokucina lelixha lesibili izihitshelo lezi zikhangelene.

13Ngakho benza izingwegwe zegolide ezingamatshumi amahlanu bazisebenzisa ukuhlanganisa izixha zombili zamakhetheni ukuze ithabanikeli libe yintonye.

14Benza amakhetheni ngoboya bembuzi aba lithente lokubekwa phezu kwethabanikeli – wonke elitshumi lanye. 15Wonke amakhetheni la alitshumi lanye ayelingana – eyizingalo ezingamatshumi amathathu ubude, ububanzi eyizingalo ezine. 16Bahlanganisa amakhetheni amahlanu aba yilixha, benza okufanayo lwakwayisithupha. 17Benza izihitshelo ezingamatshumi amahlanu zilandela umphetho wekhetheni elisekucineni kuluhlu lwakuqala, benza okufananayo kukhetheni loluhlu lwesibili. 18Balungisa izingwegwe zethusi ezingamatshumi amahlanu ukuze bahlanganise ngazo ithente libe yinto yinye. 19Benza isembeso sethente ngezikhumba zenqama eziphendulwe ngomphendulo obomvu, kwathi ngaphezu kwalokho benza isembeso ngezikhumba zezinyamazana zolwandle.

20Babaza amathala okumiswa ngezigodo zesihlala som-akhakhiya bewenzela ithabanikeli. 21Ithala lilinye lalizingalo ezilitshumi ubude, ububanzi buyingalo elengxenye, 22kulemisuka emibili ephutsha ilinganisene. Wonke amathala ethabanikeli enziwa ngale indlela.

23Babaza amathala angamatshumi amabili eceleni leningizimu lethabanikeli 24benza izisekelo zesiliva ezingamatshumi amane ezazihamba ngaphansi – izisekelo ezimbili ethaleni linye, sisinye ngaphansi komsuka.

25Kuleli elinye icele, icele lenyakatho lethabanikeli, babaza amathala angamatshumi amabili 26kanye lezisekelo zesiliva ezingamatshumi amane – ezimbili ngaphansi kwethala lilinye. 27Babaza amathala ayisithupha awecele elibucwala ngentshonalanga yethabanikeli, 28babaza amathala amabili awemagumbini asekucineni bucwadlana. 29Emagumbini womabili amathala ayelohlonzi oluphindwe kabili kusuka phansi kusiya phezulu ehlanganiswe ngesongo elilodwa, womabili enziwa ngokufananayo.

30Ngakho kwenziwa amathala afica minwemibili lezisekelo zesiliva ezilitshumi lesithupha – zimbili ngaphansi kwethala lilinye.

31Benza njalo imithando ngezigodo zesihlahla som-akhakhiya: emihlanu ingeyamathala akwelinye icele lethabanikeli, 32emihlanu yayingeyelinye icele, kwathi njalo eminye emihlanu yaba ngeyamathala entshonalanga bucwadlana ekucineni kwethabanikeli.

33Umthando waphakathi bawelula usuka kwelinye icele usiya kwelinye phakathi kwamathala.

34Bahuqa amathala ngegolide benza amasongo ngegolide abamba imithando. Njalo bahuqa imithando ngegolide.

35Benza ikhetheni ngelembu elicolekileyo, elilentambo eziphethiweyo eziluhlaza, eziyibubende lezibomvu.

36Benza izinsika ezine ngezigodo zesihlahla som-akhakhiya bazihuqa ngegolide. Izinsika bazenzela izingwegwe zegolide kanye lezisekelo ezine zesiliva.

37Benza iveli lesangweni ngelembu elicolekileyo elilentambo eziphethiweyo eziluhlaza, eziyibubende lezibomvu – umsebenzi wombalazi ngokuthunga; 38njalo benza izinsika ezinhlanu zilengwegwe zazo. Bahuqa izihloko zensika kanye lamabhanti azo ngegolide njalo benza lezisekelo ezinhlanu ngethusi.